កំពង់ស្ពឺ៖ ព្រះរាជពិធីច្រត់ព្រះនង្គ័ល បានរៀបចំទៅកាលពីថ្ងៃទី២៦ ខែឧសភា ក្រោមព្រះរាជាធិបតីភាពរបស់ព្រះករុណា ព្រះបាទ សម្ដេច ព្រះបរមនាថនរោត្ដម សីហមុនី ព្រះមហាក្សត្រនៃកម្ពុជា ក្នុងបរិវេណមន្ទីរអប់រំ យុវជន និងកីឡាខេត្តកំពង់ស្ពឺ។
ជាលទ្ធផល ព្រះរាជពិធីច្រត់ព្រះនង្គ័ល ឆ្នាំ២០២៤នេះ តាមរយៈការបរិភោគរបស់ គោឧសភរាជ បានបង្ហាញថា ស្រូវ ពោត បានទទួលផល ៩៥% និង សណ្ដែត ៨៥ %។
តាមប្រថ្នូលនៅឆ្នាំនេះ កសិផល ស្រូវ ពោត និង សណ្ដែត គឺនឹងទទួលបានទិន្នផលល្អ។
ព្រះរាជពិធី “ច្រត់ព្រះនង្គ័ល” ជាបុណ្យតាមប្រពៃណីមួយក្នុងចំណោមពិធីបុណ្យទ្វារទសមាសផ្សេងៗទៀត ដែលតែងតែរៀបចំឡើងនៅថ្ងៃ៤រោច ខែពិសាខ ជាមង្គលចម្រើននៃការសាបព្រោះបណ្ដុះដាំក្នុងរដូវវស្សារបស់ប្រជាពលរដ្ឋ ដែលមានព្រះមហាក្សត្រជានិមិត្តរូបយកព្រះទ័យទុកដាក់ដល់ការបង្កបង្កើនផលដំណាំ។
ព្រះរាជពិធីនេះ ធ្វើឡើងដើម្បីផ្សងមើលប្រផ្នូលក្នុងស្រុកទៅតាមការទស្សន៍ទាយ លើការបរិភោគរបស់ “គោឧសភរាជ”។ ម្យ៉ាងទៀត ជាការដាស់តឿនក្រើនរម្លឹកដល់ប្រជាពលរដ្ឋខ្មែរដែលជាអ្នកធ្វើស្រែចំការឱ្យបានដឹងថា រដូវធ្វើស្រែចំការបានចូលមកដល់ហើយ នឹងត្រៀមនូវស្រូវពូជ និងគ្រាប់ពូជដំណាំផ្សេងៗ គោក្របី រទេះ ឧបករណ៍សម្រាប់ធ្វើកសិកម្ម និងកម្លាំងពលកម្មសម្រាប់ការធ្វើស្រែចម្ការ។
ព្រះរាជបវេណីដ៏សំខាន់នេះត្រូវបានព្រះមហាក្សត្រគ្រប់ព្រះអង្គតែងតែដឹកនាំធ្វើពុំដែលខាន តាំងពីបុរាណកាលរៀងមក។ កាលពីដើមឡើយបានប្រារព្ធធ្វើឡើងនៅវាលព្រះមេរុនៅជិតព្រះបរមរាជវាំង តែប៉ុន្មានឆ្នាំចុងក្រោយនេះព្រះរាជពិធីត្រូវបានព្រះមហាក្សត្ររាជានុញ្ញាត ឱ្យធ្វើនៅតាមខេត្តវិញម្តង ដើម្បីឱ្យប្រជាពលរដ្ឋខ្មែរបានចូលរួមក្នុងព្រះរាជបវេណីដ៏សំខាន់មួយនេះ៕
